Nehustan

 Lalhruaitluanga

 “Kraws thu chu boral mekte tan chuan atna a ni si a; keini chhandam mekte tan erawh chuan Pathian thiltihtheihna a ni zawk e” (1 Korinth 1:18)

  Tunlai Zoram khawvel han thlir ila, mi tam takin Pathian thu kan buaipui in kan ruih chilh hle mai, mahse chutih lai erawh chuan buaipui tur tak ni lo, Bible thu te vek behchhan si hian kan buaipui thei dawn hlein a lang, mi tam takin kan buaipui mek bawkin a hriat a ni.

  Johana 3:14 thu kan chhiar chuan,"Tin mosian thlalerah rul a khai kan ang khan Mihring Fapa hi khai kanin a awm bawk tur ani" tih ziak kan hmu a. Chutih lai hun chuan, Israel fate chu Mosia leh Pathian lak ah helin an vui vai a, “thlalera thi turin angati nge Aigupta ram ata min hruai chhuah? Chhang awm hlei lo, tui pawh awm hlei lo; he chhang tenawm pawh hi kan nunnain a ten tawh a ni” tiin an Pathian an dem ani tih Numbers bung sawmhnih leh pakhat thu kan chhiar chuan kan hmu a. Tichuan Pathian in rul chuk na mi a tir a, mi tam tak an thi ani tih kan hmu a ni.

   Chutia rul chuk na mi vanga mi tam tak an thih tak ah chuan mipuite chuan Mosia chu Pathian hnen a tawngtai sak turin an ngen ta a, tin Pathianin Mosia hnenah rul chuk na mi, a lem siam a khaikang turin leh rul chuk apiangin chu chu an en chuan an dam zel ang tiin a hrilh a, mipuiten a an huat em em, an zinga mi tam tak thihna thlentu rul lim vek chu an damna tur a tan a rawn hmang ta a, chu tak mai chu sual Setana’n rawn hmang ve in, mipuite chu a tidamtu an Pathian aiah chu dar rul ngaih sanna chu an thinlung ah alo tuh ve leh ta a ni.

   Lalte lehkhabu kan chhiar chuan, chumi kal zel ah Israel faten chu Dar Rul a chu pathian anga bia in a hming ah Hebrai tawngin NEHUSTAN an ti a (2 Lalte 18:4), chu chu Pathian in a haw hle mai a, Israel Lal te zing ah chu Nehustan chu tichhe thei reng an awm lo, Lal Hezekia rawn lan hma zawng chuan tih kan hria a ni. Chuvang chu a ni ang Israel lalte zingah Hezekia chu lal hna thawk ṭha ber ti a ziak ani reng a ni.

  Chutiang ang bawk chuan Mihring Fapa kan Lal Isua pawh chu Kraws lerah dar rul anga khai kan a lo ni ta a, a hma lam zawnga Kraws anchhe dawng misual ber te thihna, Israel faten rul an huat ang leh an ten ang maia hmun hnuchhawn chu a rawn thlang leh ta a ni. Chu hmunah chuan kan damna turin kan tan tlanna hna min thawhsak a, kha thing kawkalhah khan damna a awm lova, chumi lera thi kan Lal Isua Krista, kan Pathian neih chhun chu kan damna chu a lo ni.

  Tunlai khawvel a Christian inti tam takte pawh hi Setana bum thlukin kan awm leh mek zawng a nih hi. Tidamtu Pathian aia a hmanrua dar rul chawi sanna chu kan thinlungah tuhin a awm mek a, chhandamtu Pathian aiin a thihna Kraws kan ngai sang ta, damna emaw kan ti a, ramhuaiten an hlau emaw kan ti zo ve ta. I Korinth 1:18 a kan hmuh ang khian kraws thu chu a thihna thu hi emaw kan ti zo ta. Chu kraws ler a khai kana awm (Isua) thu hi kraws thu chu a ni tih kan hre thei ta lo a ni.

Pathian kan hmangaihna chu kan nitin nun a kraws kawng zawh nun neih a, Lal Isuan kan tan a tuarna anga a tana hreawm tuar ve hi niin kan hre zo a, bumin mi tam tak an awm mek anih hi.

  “Pathian kan hmangaihna chu hei hi a ni, a thupekte kan zawm hi” (1 Johana 5:3). Tin, Lal Isua vekin,”Nangnin mi hmangaih chuan ka thupekte chu in zawm ang” (Johana 14:15) a tih ang khan Pathian kan hmangaihna zawk chu a thupekte anga tui leh thlarauva piantharna leh a hre lote hnena hril zelna zawk hi a ni (Marka 16:15,16). Keini chhandam mekte tan chuan chu kraws thu chu Pathian thil tih theihna a ni si a.