Buaipui tham Isua

 Lalhmangaihkima 

Kan thupui en ringawt pawh hian kan rilruah thil tam tak a lo lutin ka ringa, kohhran-ho te hi engtiang chiaha mawi nge kan tum, mahni ṭheuh lo inngaihtuah ila a ṭha hle ang.

Khawvela cheng kan ni a, hun leh ni a lo inher danglam zela ram a ṭhangin mimal leh chhungkaw tinte pawh he changkanna hian min hip ṭheuh awm e, kohhran-ho te pawh min hipa kan nun dan pawh a lo changkang ve zel bawk a ni, chumi a nih mek lai pawh chuan kan inen fiaha engtiang chiah hian nge kan inthuama kan mawi ber ang, tih hi kohhran mi mal tin-te inenfiah ila a ṭha khawp ang.

 Kum tinin kohhranin inkhawmpui kan nei ṭhin a, rampum huap kohhran nu-ho (LAD) inkhawmpuite hi an sawi ṭhina kan changkang tawh a incheina chungchangah pawh kan sang tawh hle kan ti ṭhin, chumi piah lamah nu-ho te, fashion ah kan sang tawh lutuka ṭhalai te (PYD) inkhawmpui ai pawhin kan nalhin kan inchei tawh zawkte an ti ṭhin, a dikna chen pawh a awm mai thei engpawh chu ni se, khawvel ruala kalin, a nalh pawh kan nalh tur a ni ve reng a ni.

             Chutiang zelin ṭhalai( PYD) nula-te pawh, changkannain kan nunah nasa takin thu a sawia, hmalam panin ke kan pen ve zel bawk a ni. kan incheina kan thuamhnaw te pawh a lo changkang ve zela, kan puan bih te, kan pheikhawk bun te, kan kawr hak te pawh a changkangin a nalh tawh tak zet a ni, mi aia nalh loh  hlau reng rengin kan hmanhlela kan hmui hmai hnawi re re te pawh tunlai thei ang ber kan duh zel tawha, amaherawh chu kan hmel thatna leh kan mawina ber a ni angem tih hi, kan inzawh nawn  fo atul hle bawk a ni.

             Mipa-te pawh kan ni zel tho e, thenkhatte phei chu mi lar tih dan kan laa, pang tak takin kan inthuama kekawr zuih tak tak te, kawr mar tengtung hak te, pheikhawk chhip zum sei pui pui te pawh kan bun ṭhin bawka, khawvel kal ruala kan kala thalai zia anga kan tih ve zelte pawh a tul thei bawka a tha vek tho e; amaherawh chu kan mawina ber a ni em, tihlai tak hi a pawimawh lai takchu a la ni fan a ni.

             Mimaltin leh chhungkaw tin te pawh, in leh lo tha te, inchhung bungraw tha tak tak te leh silh leh fen sum leh pai lirthei thleng pawh a niang chu, heng kan neihte hi kan mawina leh zahawmna berah kan ngai ang tih hi a hlauhawm hlein ka hria, khawvela kan awm chhung chuan, Lalpa malsawmna kan dawnga khing kan sawi tak zawng zawngte khi a thei anih chuan kan nei tur a ni, neih pawh kan tum tur  a ni reng bawka, amaherawh chu kan thinlungah kan dah lian lutuk ang tih hi a hlauhawm hle bawk a ni. keini Pentecos mi te chu khawvel inher danglam ang zela kal chungin , Lalpa thlarau hi kan thinlungah hian englai pawhin lal ber se tih hi thinlung duhaisam chu a ni a, thuthlung mite kan inthuamna leh kan mawina ber chu, Krista hi lo ni fo rawh se.