CHHELNA IN NGAI ASIN

Upa R.Laiawrha (L)

Chutichuan in rinna lawman chu paih bo suh u, lawmman ropui tak a nei dawn si a, Pathian duhzawng in tih hnuin thil tiam chu in hmuh theih nan chhelna in ngai asin (Hebrai 10:35)

Kristiante chuan rinna chu zam mai lovin an vuan nghet tlat tur a ni a, ringtu tam takin an chunga harsatna tuar chu an peih lo va, an beidawng a phatsan an duh fo thin a, an phatsan fo bawk.
Chuvangin Hebrai kohhran pawh hi chhel taka tuar turin fuih an ni a, Lalpa hnena mi lawmman dawn tur an nei tih an hre reng tur a ni. Paula’n a sawi angin, lawmman hmu tur chuan harsatna tam tak lo thlengah pawh chhel taka tuar tur a ni. Pathian chuan a thil tiam chu a hlen ngei dawn a; amaherawhchu, tunah chhelna an ngai a, an mamawh a, Pathian duhzawng chu an bansan tur a ni lo.

Lal Isua ngei pawh Pathian thil tiam tiputling turin, turna tinreng nen thihna khawp hial a thleng a ni. Chuvangin amah ringtu/zuitute chuan, chutianga harsatna leh tuarnate chu an pumpelh dawn hauh lo va, a chang chuan Pathian thu tiam chu lo thleng mai turin an ngaih chang a awm a, a changin a lo thlen mai loh avangin an beidawng  thin a ni. Chutiang hun a lo thlen chuan anmahni fuih leh thin an ngai a, harsatna lo thleng turah pawh huaisen taka hmachhawn a tul a, an lawmman hmuh tur chu an hmuh theih nan chhel taka an tuar fan fan a tul a ni.

“Rei lo te achinah lo kal tur-a chu a lo kal dawn si a, rei a rial tawh lovang” (Hebrai 10:37)