LUNGNGAIHNA

Lalthanpuii

Hringnun hi i ngaihtuah ve ngai em, kan eiin kan in a, kan thawka kan mamawh kan zawng a, kan hmu ta chenga duhamnain min umzui leh a, hlimna kan zawng a, nimahsela kan tawpna chu thlan khur a ni. Kan hlim nui ri pawh a reh hmain lungngaihnain a chhunzawm chang pawh a awm fo. Chung zawng zawng chu mihring kan nih chhung chuan kan tawn ngei ngei tur a ni.

Eng emaw chang chuan kan hlim pawh a ni thei, nimahsela khawvela kan chen miau avangin phur ritin min delh lo thei lo. A chang chuan min tihlimtu ngei ngei pawhin lungngaihna min thlen thei a, thihna pawhin min hmaih bik chuang lo.

Kan nuna harsatna lo thleng thinah hian a dawngsawngtu mihringte hi kan pawimawh miau avangin vanduaina chhiar thiam lo nun chuan li thuk lam a pan zel a, a chhiar thiam erawh chuan vanduaina hi vanneihna hmahruai a ni tih hriain huai takin a hmachhawn ngam thin.

Hlawhtlinna nei tur chuan hah taka thawh a ngai a, thla eng mawizia hre turiin thim hnuaia thut a ngai bawk. Chutiang chiah chuan hlimna nei tur chuan lungngaihna tawn hmasak a ngai a ni.

Kan hmalam hun lokal tur kan suangtuah zinga kan telh ve ngai loh LUNGNGAIHNA hi mahni chauh hian tuar ta tlawk tlawk ila, mihring hi engtin nge kan awm ang le? Tanpuitu tuemaw chu kan mamawh a ni, kan manganna min hnem tur leh kan phurritte min chhawk zangkhai turin.

Kan thian thate chuan kawng tam takin min pui thei pawh a ni ang, nimahsela chakna min pe tur leh beidawnna ruam atang pawha beiseina nung min siam sak rengtu chu kan Pathian chauh hi a ni.