THLARAUVA RAWNGBAWLNA

Lalhmangaihkima 

 

Rawngbawlna han tih mai hian, kan rilruah chuan thu hril hna chauh kan huamtir maithei. Tin, rawngbawltu kan tihah pawh Pastor, Tirhkoh leh Upate chauh huamtir tawk kan awm thei bawk. Rawngbawl dan chi hrang hrang a awm a, chutah chuan thlarau mite hian Pathianin min tumpui ram leh rawngbawl tura min ruatna lai hi kan hriat a pawimawh hle a ni. Keimahni duh dan leh duh zawng, kan chak zawng anga rawngbawl tur hian Lalpan min ko kher lo. Lalpan duh dan leh tha tih zawng anga rawngbawl turin koh leh thlan, ruat zawk kan ni tih hi kan hriat reng a ngai a ni. Kan tih turleh tih loh turte pawh kan thliar thiam hi a tul em em bawk. Lalpa min hunna zawn ni lova
Lalpa rawng bawl hi kan tum a nih chuan, keimahni leh kohhranhote tan hian thil pawi tak a thlen phah thei a, Pathian thlarauin min pawl lai chuan keimahniah Pathian thiltihtheihna a lo thleng nasa hle thin a,  hemi hunah tak hian kan fimkhur a tul hle thin a ni. 

Kan thinlunga lo lang apiang te hi Pathian aw emaw tih a awl em em a, chuvangin mi tam takinThlarau thu puan tiin an dinpuia, Lalpan anmahni nun siam that nan leh sawi zawi nan a pek kha kohhrante tan emaw kan din chhuahpui leh mai thin. Kan thinlunga thu lo thleng hi keimahni tan nge kohhranho tan tih uluk taka ngaihtuah chungin, Pathian kan rawn fo hi a tul hle thin a ni. “A lan angin ngaihtuah suh ula, fel takin ngaihtuah zawk rawh u” (Johana 7:24) tih hi thlarau mite chuan kan thinlunga kan vawn a, kan zawm pawh hi a tul hle a ni.

Pathian Thlarau Thianghlim changtu, leh neitu thlarau mi kan nih chuan thlarauin min hruai angin kan awm mai tur a ni. Pathian thlarau hruaina ang zela kal leh tanpui ngaite tanpui thei tura inbuatsaih hi kan tih makmawh chu a ni. Thlaraua kan khah lai tak hian kan zingah Setana hi a lo lan ve thuai thin avangin, a pawimawh leh tha ber chu Lalpa rawna tawngtaina a tam thei ang ber neih hi a ni. Kohhran hote zingah pawh a tam thei ang ber tel tum hram hram tur a ni. Pathian hnenah thlarau a finna kan dil a, kan tawngtai mawlh mawlh loh chuan kan khingpui Diabola thangah kan awk mai ang tih a hlauhawm. Diabola ngamthlemna do thei turin Pathian ralthuam famkimin kan inthuam reng thin tur a ni.       

Unaupa Lalhmangaihkima

Pathian thlarauin min pawla Thlarau Thianghlima khata nun kan hman lai tak hian, kan nunah harsatna chi hrang hrangte lo lutin,  kan thinlungah sual Setana hian hmun chan tumin min lo bei ve leh vat thin. Pathian Thlarau Thianghlim hnathawh ang tak si, a tak ni chuang si lo, kan zingah hian a lo tel ve thin a, chuvang chuan thlarau mite hian fimkhur tak leh, Pathian thlarau dik tak hriat theihnate pawh hi nei thei tura Pathian kan dil thin a tul khawp mai. “Thlarau chu Pathian laka mi a ni nge ni lo fiah thin rawh u” tih ang khan.

Rawngbawlna ki dangah pawh finna kan dil hi a pawimawh fo thin. Chu finna chu keimahni mihringte ropuina tur ni lovin, Pathian ropuina tur leh mi dangte tana malsawmna nih theihna turin kan dil thin tur a ni.ThlarauThianghlim kan dawn leh chante hian keimahni theuhah hian rah chhuahin, midangte tan malsawmna ni thei turin min siam puitlingtu ni theuh se a van tha dawn em. Thlarau lam thil a ni emaw, tanpui ngai an awma tanpui thei tura Lalpaah chakna thar kan lak fo a tul thin. Lalpa rawng bawltu inti ve chung si hian, miten kan nunah Krista hmel eng an hmu thin em le? Nun tuihal ten tanpuitu atan min mamawhna nei se, an mamawhna te phuhruk tur leh Lalpa lama kaihruai turin, Thlarau mite hian tan i la thar leh sauh sauh ang u.