MI RIN TLAK

CVL Kanglova

Tunah zawng kum tam a liam ta, mahse thinlaiah a cham veng veng hian ka hre thin. Kha hun hlimawm tak thin lungrual taka kan len lai te, hlim taka hmangaihna par tlana tawngkam mai ni lo, hmangaihna tak taka kan inhmangaih hun hlimawm tak thin te kha ka va ngai thin tak em. A hun zawng a rei lo nanga, thinlungah zawng nghilh ni reng kan nei dawn lo a nih hi. Lai Eden-ah hian vanram nun kan lo tem ve ni ber hian ka hre thin.  Inhmangaih ang u tih a ngai lova, inthlahlel em em leh inngai tak
chungin chhun leh zan kan hmang a, sakhmel intawngin awm dun thin mah ila, inngaih a bang chuang lo. Kan inhmuh ngun poh leh inngaih a zual ting mai zawng a nih kha. Aw kha hun tâwi tê, hlimawm tak si kha theih ni se koh kir leh ka va chak thin em.

Mahse, mahse a la tlai lo e, kumin liampui tam tawh mah se la, a la tlai lo e, tun hi hun lawmawm chu a ni lo'm ni. I awmdan leh nungchang te, kohhran i hmangaihziate ka hmuh hian, nangmahah hian beiseina sang tak ka nei a ni. A chhan chu maw, tawngka chauhvin thahnem i ngai ngai lova, a sawia sawi hmangaihna ai chuan, i nunah hmangaihna a taka hmuh tur awm te, mi fing tak leh Pathian Thlarau mi i ni tih ka hria, mahse i intifing ngai lo va, i inti-thlarau mi ngai hek lo. Lungawi lohna i neihin lamtang zawngin i vak ngai lo va, i dik lohna leh fel lohna miin an sawiin, dik leh fel nih duh avangin dawt i sawi ngai hek lo. Kohhran tana thahnemngaihna kawngah lah ni se, mi dangte phut hauh lova mahni ta ang maia i thawk ka hmuh hian, nangmahah beiseina ka nei zual thin.

I awmdan leh nungchangah hian sawi tur tam tak a awm ang, mahse ka sawi seng lo ang a. Thutak buhhawpa har i len leh Pathian Thuthlung dik tak buhchangruma chawm len i ni tih ka hria. Nangmahah hian kohhran rawngbawltu tam takte hian entawn tur an nei hian ka hre thin. Chuvangin nangmahah beiseina sang tak nei chungin ka lo thlir reng che a, he Jerusalem kulh chhia ni lovin, a chhunga cheng chau takte hi hruai chhuaka tiharh leh turin, Pathian hnenah I tan ka lo tawngtai reng thin a ni.