July ni 12, 2020 ah Unaupa B.Lalramsiaman min boral san avangin, Hebron PYD ten July ni 24, 2020 zan khan khawhar chhungte inkhawmpuina kan nei.

B.Lalramsiama (L)

aupa Lalhmangaihtluanga'n kan hunte Pathianhnenah a hlawn a, Unaupa Lalmuansanga hnen aṭangin Pathian thuchah kan ngaithla a ni.

Unaupa B Lalramsiama chanchin tlangpui.

Pu B.Lalramsiama hi, Pu B.Lalana (L) leh Pi Lalhmingsangi (Seni) te fa pali zinga upa ber dawttu ni turin 1977 khan a lo piang a. A pian lai hian Darnam vengah an chhungkua hi khawsain, 1990 khan Serchhip Chhim vengah an insawn phei a. Kum 2003 June ni 16-ah K. Hrangzeli nen innei in fa mipa 3 leh hmeichhia 1 an nei a ni. Amah hi two wheeler mechanic thiam tak a ni a, rual pawl thiam leh mi dangte hriat thiamna ngah tak a nih avangin mi ngainat a hlawh hle.

Infiamna lamah football-ah a tui hle a, thian zahova club te dininVice President nihna a chelh a, khaw dangah te pawh inkhelin an lo feh chhuak thin a, volleyball lam pawh a tupui hle bawk.

A tlangval lai hian kohhran leh rawngbawlna kawngah a phak ang tawka inhmang thin a ni a, kum 1997-98 khan Hebron PYD ah Vice President niin, 1999-20 chhung khan Treasurer nihna a chelh bawk.

A hun hnuhnung lam:

Kum 2020 Feb ni 26 (Nilaini)-ah ARC Chhiahtlangah dah a ni a, tha tak leh fel takin a awm a, amaherawhchu a tonsil nuam lo a tih avangin April ni 14 ah Serchhip damdawi inah inentir turin Home-a thawktu ten an hruai a. Doctor-ten tonsil vung an lo ti a, damdawi te chawhin an awmna hmun ngaiah an haw leh a ni. Home atanga a rawn chhuah hian Pathian thu sawi nuam a ti em em a, a duh angin tawng thei lo mah se la, a thei ang angin a sawi hram hram thin.

May ni 2 khan C.O –in an nu rawn phone-in, chhungkua lo inrawn khawm turin a ti a, chhungkua inrawn khawmin May ni 4 khan Home atanga la chhuakin Serchhip damdawi inah inentir leh nghal a ni a, Doctor ten Aizawla kal tura an tih avangin May ni 7 khan Durtlang lam pan niin admit nghal a ni a, May ni 9 khan damdawi in atanga chhuak lehin Serchhipah hawpui leh a ni. Biopsy result hi May ni 16 ah a rawn chhuak a, a result hi a that vak loh avangin a pu Ronghaka motorin Aizawl lamah tlan thlakpui leh a ni. A natna hi cancer a ni tih hriat a nih hnuah, May ni 21 khan Zemabawk Cancer damdawi inah admit a ni a, Chemo khai a nih hnuah May ni 25 ah damdawiin atanga chuakin a tukah Serchhip lamah an haw.

June ni 29 khan Aizawl lamah innentir turin a thianten an hruai thla leh a, hemi ni hian inentir a rem loh avangin leh harsatna dang avangin July ni 2-ah Chemo khai turin Zemabawkaih admit leh a ni. July ni 7ah Chemo hi an khai zo va, in lama inenkawl chhunzawm turin a tuk ah an haw a, July ni 23 ah inentir leh tura tih a ni.

Amaherawhchu, July ni 11 (inrinni) zan khan a nuam lo leh deuh a, a tuk Pathianni zing (July ni 12)-ah Serchhip Damdawi In panpui a ni a, Doctor leh Nurse ten theih tawp an chhuah a, nimahsela, a natna-in a hneh em avangin tlai dar 5:54 PM khan a hmangaih a chhungkua leh thenrual tha te a kalsan ta a ni.