CHHANDAMTU A LO KAL

Hruaia Ralte

Kei, keimah ngei hi, Lalpa chu ka ni; keimah lo chu chhandamtu rêng rêng an awm lo (Isaia 43:11).

Lalpa Pathian chuan amah lo chu chhandamtu dang reng reng an awm loh thu a lo sawi tawh a, tichuan Luka 2:11-ah,"Vawinah in tan Davida khuaah CHHANDAMTU a piang ta, Lal Krista chu" tiin chhandamtu-a ngei kha a lo piang ta a ni.

Israel fate khan an Pathian an auh khan, an au thawm chu hriain anmahni chhan chhuak tur mi a tir ta thin a, chunga a mi tirhte chu chhandamtu tia sawi an ni ve tho mai. Chu mitè avang chuan, Pathiana mi nung pathum awm ringtu ten, OT lama keimah lo chu chhandamtu reng reng an awm lo titu kha a lo kal ni lovin, a mite chhandam turin Isua chu EHUDA (Roreltute 3:15) te anga ruat ve mai a ni, amah Jehovah (chhandamtu) lo piang a ni lo ve, an ti ta hram a nih chu.

Lo ni ta se :

Isua hi Pathian in a mite au thawm hriaa chhandamtu (saviour) a ruat sak thin ang lek ni se, chatuan mi, Pa ding lama thu, Pathian pakhat a minung pathum intluk tlang nia Trinity thurin in a pawm chu a phet dèr a ni.

A nihna tak -

"Chhandamtu a piang ta, Lal Krista chu" tih ang khan, Isua hi Lal a ni tih i hre phawt teh ang, leiah lalram a nei lem lo, eng nge Lal a nih tho si, e le Van Lal a ni.

Juda te hian Pathian chauh lo chuan sual a ngaidam thei lo tih hi an hrechiang em em a, Isuan zeng a tidam a, "I sualte ngaihdam a ni tawh e" a tih khan, lehkha ziaktute leh Pharisaite chuan, “Pathian sawichhia hi tu nge maw a nih le? Pathian chauh lo chuan tuin nge sualte ngaidam thei ni?” tiin an ngaihtuah a (Luka 5:21), mahse Lal Isuan an hnenah, "Eng pawh ni sela, khawvêlah Mihring Fapa hian sual ngaihdam theihna a nei" tiin a chhang a nih kha.

Pathian chauhin sualte ngaihdam theihna a neih lai a, Isuan sual a ngaidam si hian, amah chu Pathian a nihzia a pho lang chiang hle a ni.

A dang leh -

Lal Isua hi Davida bulpui leh a thlah arsi eng tak, varparh a ni.

Lal Davida khan, Isua a biak kan hre lo, a Pathian pakhat chauh, a hriat danah Jehovah kha a ni a biak thin chu. Pa Pathian Jehovah kha a ni Davida bulpui chu ni. Tichuan naupang a lo piang a, a hmingah Isua an sa, chu Isua chuan heti hian thu tawp a khar a nih hi, i han en teh ang...

“Kei Isua hian kohhrante tân hêng thu hi in hnêna hriattîr tûrin ka vântirhkoh ka rawn tîr a ni. Davida bulpui leh a thlah, arsi êng tak, Vârparh chu ka ni,” a ti a.(Thu Puan 22:16)

Tisa lam thu-ah chuan davida thlah a ni a, kawng leh lamah chuan davida bulpui, davida Pathian neih chhun, Pathian awm chhun, kei lo chu chhandamtu dang reng reng an awm lo titu Jehovah kha a ni leh lawi si.

A tawp nan -

Mosia khan Krista a lam rik ngai kan hre lo, a mite chhan chhuak tura tirtu chu a Pathian Jehovah kha a ni. Mahse Tk.Paula chuan ti hian a lo sawi leh mai, "Rinnain Mosia chuan, a lo puitlin hnu khân Pharaoa fanua fapaa vuah a duh lo va;  rei lo tê atân sual nawmna hlimpui ai chuan, Pathian mite nêna tihduhdah tuar a thlang ta zâwk a; Krista an hmuhsitna chu Aigupta ram rote ai chuan sum ropui zâwkah a ruat a; lâwmman pêk tûr chu a thlîr ṭhin avângin. (Hebrai 11:24-26). Thlarauva Mosia hnena awm tlat thin Pathian kha Lal Isua Krista hi a lo ni.

Tin, zawlneite leh Mosia vek hian, (Genesis, Exodus,Leveticus, Numbers, Deuteronomy leh zawlneite lehkhabu zawng zawng tihna) tu chanchin nge an lo ziah reng ni kan tih chuan, Luka ziak kan en chuan, "Tin, Mosia leh zâwlneite zawng zawng lehkhaah a ṭan a, Pathian Lehkha zawng zawnga ama chanchin ziak apiang chu anmahni a hrilh fiah zêl a" (Luka 24: ‬27) tih kan hmu a ni. OT lama Pathian chanchin kan sawi hian, Lal Isua chanchin sawi kan lo ni. 

Tin, Paula rawngbawlna kan en chuan, Pa Pathian leh Fapa Pathian an sawi hrang lo, mi thuhmun an nih a hrechiang em a, chuvang chuan, "Tin, ni an tiam a, chumi niah chuan a thlen inah a hnênah mi tam tak an lo kal a; zîng aṭanga tlai lam thlengin an hnênah chu thu chu a hrilhfiah a, Pathian ram thu a hriattîr a, Mosia Dân Lehkha thu leh Zâwlneite Lehkhabu thuin Isua lamah anmahni a thlêm a thlêm a" (Tirhkohte 28:23" tih ziak kan hmu bawk a ni. Lal Isua lo chu Pathian dang reng reng an awm lo. Pathian hming chu Isua a ni. Amen.