Taimakna - Lalhmanngaihkima

 Pathian rawngbawlna leh kan ni tin nunah hian taimakna hi a pawimawh em em a. Kan Pathian thuah pawh ringtute chu taima tur a zirtir kan ni a. Taimak hi a zir theih a, chu mi a zir tur chuan taimakna rah chhuah leh taimak loh a pawizia te pawh kan hriat a ṭul hle awm e. Lalpa rawng bawl a ni emaw, tisa lam hnaah a ni emaw, hlawhtling tur chuan taimak a ngai a, chumi piah lamah mi taima nun chu a awhawmin hmuh a nuam a ni.

Kohhranhote Pathian rawng kan bawlnaah leh tisa hna kan thawhnaah hian taima taka thawk tur kan nihzia inzirtir tam hi a ṭul hle a ni. Pathian malsawmna dawn kan duh a, kan hmuh mai loh chhan te pawh hi kan taimak loh vang a ni fo ṭhin. Eng pawh ti ila, taimak chhuah lehzual tura kan infuih sauh sauh a pawimawh khawp mai.

Thufingte 12:27 ah chuan, "Mihring sum hlu chu taimak a ni", tih kan hmu a. Mihringte hian hausak a, rohlu tam tak neih kan duh ṭheuh a, mahse, chutiang nei tur pawh chuan taimak a ngai tho a ni.

Sap thu fing chuan, "Hlawhtlinna bul chu taimak a ni"' a ti a. Eng hna pawh thawk ila, hlawhtling tur chuan taimak a ngai a, mite aia hniam leh harsa bika inngaih tlatna kan nei ṭhin te hi a ṭha lo va, taimakna kan neih chuan hengte hi a bo vek thei a ni.

Lalpa hnenah malsawnna kan dil a, hriselna tha zawk kan neih theih nan te kan ṭawngṭai thin. Hriselna leh damna min pe a, leng mai maia zelthel taka awm lovin, kan hlawhtlinna tur leh Lalpa malsawm zel tlaka Ama tana kan thawh zel hi a pawimawh hle dawn a ni.

Kohhrante hian taimakna kan mamawhna kawng hrang hrang a awm thei awm e.

(1) Inkhawmah: Inkhawm hi taima tak leh ṭhahnem ngai tak tak awm mah se, a nawlpui chuan kan taima tawk lo ṭhin a. Pathian hmangaih a, A rawngbawl leh Amah fak leh chawimawi nuam tite chuan inkhawm lo tura daltu an insiam ngai lo a ni.

Kohhranhote tun aia inkhawm kan taimak lehzual chuan Lalpa malsawmna tam zawk kan dawng ngei ang.

(2) Ṭawngṭaina: Ṭawngṭaina hi a pawimawh em em a, Pathian nena kan inbiak pawh theihna awlsam leh ṭha ber a ni. Ṭawngṭai taimate nun chu a hlimin a zangkhai ṭhin a, Lalpa thlarau awmpuinain hun an hmang ṭhin a ni. Kohhranhote hi tun ai hian ṭawngṭainaah ṭan lain, taima taka Lalpa kan biaka kan dawr ṭhin chuan, mi mal tin kan hlimin kan lawm ang a, kohhran inkhawm leh rawng bawl ho pawh a nuam kan tiin kan phur tlang ngei ang