SUAL BUL LEH THLEMNA - Lalhruaitluanga

Genesis 3 : 6 kan chhiar chuan, Eden huana bawhchhiatna thu kan hmu a, chu chu Bible-a sual ziah lan hmasa ber a ni. Thei rah ei loh tur ei kha nge, ei tura thlemtu kha sual bul chu ni ang tih pawh hi inhnial theih tak a ni ang.

Thlemna hmanrua

A thlemtu nge a thlem thluka kha kan kawh ang tih lamah chuan sawi thui lo ta mai ila, a nih tur ang a ni zo tawh tho bawk a. Keini tana pawimawh ta bera chu, "Eden huana Evi thlemna hmanrua a kha a la nung reng", tih lai hi a ni. Bible ziak angin, kha thei rah kha itawm tak a ni a, mit la tak a ni tih hi tun huna ringtute tan hian a la dik reng fo mai. Anni kha chu Lalpa lakah an la inthlahrung tal a, tunlaiah zawng, inthlahrung hauh lo leh thlem pawh ngai mang lova tlu hi kan tam awm asin!

He sualna record hmasa ber a tlukna tur a ṭangkai chu keimahni theuhah hian a la kim thlap a, Eden sualna hi pass (kal-hlen) turin mitin i inbuatsaih zawk teh ang. Itawm tak, mit la em em, sawi nuam tak, pan nuam, tỉh loh zawk nuam te, min tifing sawt thei, mahse, Pathian laka min hnuk hla si ṭhin thil tam tak hi kan ban phaka rah, lawha ei mai tur hi a la awm reng a nia aw, loa ei ve lo nih i tum teh ang.

Thei rah ei kha kan tan sual bul chu a ni ber mai

Thlemtu nge thlem thluka kha kan kawh ang tih lam chu sawi zui lo mai ta ila. Thei rah ei vanga chhia leh ṭha hria kan nihna hi Pathian laka sual kan nihna ber mai chu a ni awm e. He mihring, chhia leh tha hria nia inhria, mi finga hian alawm Pathian rorel dan kalha do ṭhin chu.

"Tisa chuan thlarau lam thil te chu a do thin si a", duh dan leh ngaih dan, Pathian thu nen a inhne rem em tih chik miah lova mahni thua ṭha kan tih zawng kawng kan zawh fona hian thlarau lam tui hna a ti kang ṭhin.

Tunlai thil leh kan hun tawn mil a, Pathian duh dan nia kan hriat kan kalpuina hian kawng ṭha lo leh zualah zawi zawiin min thlen thei a, fimkhur tak leh thlarau hruaia awm tura kan intuai thar fo hi a ṭ0ul hle a ni.

Eng pawh ni se, kan theihna leh mihring ngaih dan mai a innghat lo va, ṭawngṭai a Pathian rawn chunga kal kan chin fo chuan, A khawngaihna kan chang ve mahna. I beisei phawt mai teh ang u.

Chhiartu zawng zawngte Lalpa'n malsawm che u rawh se.