Thianghlimna

Ziaktu - Rev Zaikunga

Chanchin ṭha leh thianghlim hi thil inkawp tlat a ni. Chanchin ṭha eng a thlenna apiangah mi a tithianghlim a ni. Tlang chunga Lal Isua’n a zirtir ṭum pawhin, “Thinlunga thianghlimte chu an eng a thawl e, Pathian an la hmu dawn si a” a ti a (Mat 5:8).

Chu chu Tirhkoh hian a sawi nawn leh a, “Thianghlimna lo chuan tu ma'n Lalpa an hmu lo vang,” tiin (Heb 12:14). Thianghlimna chu Pathian mite inthuamna, an nunna an tih tlat chu a ni. Tunah hian Kum sangbi thar kan chuangkai mek a. Heng hunpui lo thleng hian rorelna ni ropui, mi thianghlimte lak bo hun leh buaina hun a her chhuak ngei ang tih hi Bible chhiartute chuan kan ringin, sakhaw dang hruaitute leh mi thiam kan tih te pawhin hun danglam tak lo thleng ngei turin an beisei a ni. Keini Kohhran pawh hi rorelna ni hnai tawh takah hian thianghlimnain inthuam ila, khawvvel bawlhhlawh lakah i in thiarfihlim ang u. Kan thianghlimna tur tlem I lo sawi teh ang :-

SUM LEH PAIAH THIANGHLIM A NGAI:

Thuthlung thar a lo din tirh khan lungrual leh inhmangaih taka an awm dial dial laiin, Anania te nupa-in SUM an zep ru ṭhen a, Apostol Petera’n, “ Mihring bum in ni lo, Pathian bum in ni e” tia a hauh rualin an chungah thihna a lo thleng a (Tirh 5:4), chu chuan kohhran a tibuaiin a hria apiangin an hlau hle a ni. Sum enkawltuten sum an tih dik lohvin kohhran chhungkuaah buaina a thleng thei a. Sum enkawltuten rinawm taka an enkawl chuan kohhranin malsawmna tam tak a dawng a, sum a tam a, kohhranin hma a sawn ṭhin a ni. Tunlaiin kohhran hotute sum lamah fimkhur a ngai hle mai. Ram hruaitu, a mawi lo zawnga hmingthangte an awm a, chu tih lai chuan kohhran pawh kan fimkhur a ngai a ni. Rawngbawltu General leh District, bial leh tualchhung kohhran thlengin sum leh paia hlemhletna lakah kan inthiar fihlim a, kan thianghlim a ngai tak zet a ni.

MIPAT HMEICHHIATNA A THIANGHLIMNA : 

Thuthlung hlui hunah Puithiam Elia faten hmeichhia inthawi tura kalte an mutpui a (I Samuel 2:22), chung avang chuan ropuinain Israel a chhuahsan a. Kohhranhote Lalpa Thlarau Thianghlim awmpuiin kan hlimin kan lawmin kan innel a, chu chu hmang thiam lovin rawngbawltute kan mualpho ṭhin. Mipat hmeichhiatna sualah kan tlu lut fo mai! Chuvang chuan Tirhkoh Paula pawhin, “Mipa tan hmeichhe khawih loh a ṭha” a tih phah hial reng a ni (I Kor 7:1). Pathian malsawmna dawnga kohhran kan lungruala kan hlim hian, Setana mit a kham tih hriaa fimkhur a ṭul a ni. Kohhranah hian kan thawh hona tichhe turin Setana’n min chang reng a ni tih i hre reng ang u. 

CHAPONA SUAL LAKAH THIANGHLIMNA :

Chapona hian kohhran leh mimal pawh a tichhe ṭhin. Hei hian Pathian rinna a tichhiain mihring felna leh finnaah a innghat a, kohhran hruaitu leh thlarau mite hmusitin kohhran chu Pathian hlatah a awmtir ṭhin. Kan hnena Thlarau Thianghlimin hna a han thawh a, Pastor te leh hotute lamtualah te tlua an tal ṭhin hian, kohhranhote thuhnuairawlh leh inngai tlawm a, Lalpa chauh ropui ber rawh se tih hi min zirtir a ni. Lalpa chungah rinna i nghat tlat ang u. Chapona sual chu hnehin Lalpa chauh chu Kohhran hian chhuang zel ila, Lalpa malsawmna tam zawk kan dawng zel ang.

RUIHTHEIH THIL LAKA THIANGHLIMNA :- 

Ruihtheih thil hian tunlai khawvel chu a tuam nasa hle a ni. Jan ni 8, 2000 AD khan New Delhi-ah khawvel huapin conference an nei a, ruihtheih thil, mei zuk do dan tur an ngaihtuah a, rei lo tê-ah hian Malaria leh TB natna avanga thi aiin meizuk avanga thi kan tam zawk dawn a ni an ti. Heng chhiatna thleng mek hi khawvel mite pawhin an dova an buaipui lai hian, keini kohhran, “ Thlarau Thianghlim” neitute hi kan ngawi mai dawn em ni? Kan taksa, Pathian In, kan ven thianghlim hi kan mamawh a ni (I Kor 3:16). Sam 93:5-ah chuan, “Thianghlimna hi i In nen a inmawi a ni” a ti. Chuvang chuan Paula chuan, “ Nangmahni ta in ni tawh lova, mana lei in ni….in taksaah Pathian chawimawi rawh u,” a ti (I Kor 6:9-12). Tisa leh thlarau bawlhhlawhna zawng zawng lakah i inthiar fihlim ang u. 

Pathian ṭih dekin thianghlimna tifamkimin, kan taksa tana ṭha lo te sim vek ila. Kan taksa tana ṭha lo tih hre reng chunga kan tih luih avangin kan hriselna te lo ṭha lo ta se, a pawi hle dawn a ni. Chumi aiah chuan Pathian thu awihin; kan taksa, Pathianin a thisena a lei tawh chu veng ṭha ila, malsawmna kan dawng nghal ang a, thu awih kan ni bawk si a, a va hlawk dawn em!! Lalpa lo lanna ni hnai tawh takah hian kohhranhote, Lalpa hmuak turin thianghlimnain i in thuam tlat ang u.  Lalpa’n  Malsawm Rawh Se....