Mi puitling - Lalfakawma

“I thu tak chhak chhuah a lei kuai zawnga miten an lo lak kawih pawha i bengkhawn theih a; I kianga mite chiaia an phili buai a, A mawh nangmah an bel vek che a, Thluak fim i put theih chuan; Mi zawng zawng rin loh duap i kai a, an rinhlelhna che hmanga an sahmim an hnawh puar pawh a, mahni inrin tawkna i neih tlat chuan;

Dawt thua an chirhtheh pawh a dawt tuinu-a inchiah ve duh lo, Huat hlawh pawh a haw let ve ngai lo; Mahni induh tawk tak anga lang ngai lo leh uan thu cheh ngai lo i nih chuan…Suangtuahna thla zara len thiam-suangtuahna Pathian tlur si lo...I hmelma leh thiante pawhin an hliam theih loh hun che chuan- Ka fapa, patling i lo ni tawh ang”

He English Poem hmingthang em em pakhat, “If” tih hla, Rudyard Kipling-a phuah lehlin hi ka chhiar nawn tlut tlut ṭhin. Mi puitling (kum upa ni mai loin) zia chiang takin a tar lang a, harsatna pal tlangtu leh hnehtu, kan Bible thu thianghlim tih lohvah chuan, a mawiin a zahawm ber ang em ka ti hial mai.

He hla thu mawi em em mai hian, “Mi puitling zia” chiang takin a tar lang; An thu sawi an lo huata an thinrim hial pawha dawh thei, lungawi lohna mawh zawng zawng an burbun vek hnu pawh a, thluak fim hmanga dawhtu leh mahni inring tawk; an chunga huatna leh dawt rawlh a nih pawh a, haw let lo; chapo leh uangthuang si lo; hma lam hun thlir thiam, thlirtu ringawt ni si lo; ṭhiante ngaidamtu ni a, a hmelma meuh pawhin a an hliam zawh loh chu...Chutiang mi i lo nih hun chuan... “Ka fapa, Patling i lo ni ve ta a ni ang” tiin.

Lalfakawma

Mi a lo upat a, a kum a lo tam tak viau hnu hian ‘mi puitling’ tak tak an lo ni mai em? Nge kum upat vanga ‘puitling’ satliah?. Puitling leh Mi puitling hi an hrang daih lo maw...? Ni e, an kum a lo tam hnu chuan ‘puitling’ kan ti mai, an kum tam tak a vang chauhin. Mahse ‘mi puitling’ tak tak erawh kum naupang tê pawn a hlawh chhuak thei tlat a ni. Hei erawh kum upat vang ni lovin, chetphung leh rilru puthmang vang a hlawh chhuah tur a ni thung.

Pulpit tlang chum dup dup chunga thu sawitu ka nih a vang mai hian kohhran tan a mi ṭangkai, “Mi puitling” -ah ka inchhiar ve ngawt em? Biak In lamtuala ka tal viau avang ngawt hian “Mi puitling” ah ka inchhiar ngawt a maw? Mi tih sual leh chet mawi lohna hre em em ka nih avang hian nge ni zawk? Nge, Department khat hruaitu ka nih vang?

Kohhran upa leh rawngbawltute hi “Mi puitling” an ni ngawt lo a; nihphung, chetphung leh rilru put hmang a tanga hlawh chhuah tur a ni. Kum naupang te, tlar hnung ber atang hian, “Mi puitling” tak a nih theih a ni. He hla chang atang hian mahni han inthlir in han inteh la, ‘puitling’ nge ‘mi puitling’ ka nih le...?