KOHHRAN BAN LEH PUITLING NIHNA

H.Lalthanpuii (Ate-i)

Thu sawitu thenkhat leh tawngtaitu thenkhat ten mite an tawngtaisak hian, kohhran ban rinawm tak an nih theih nan ti tein an chham thin a, a chang leh mi chanchin sawitu ten, “Ani chu a fel khawp ami, kohhran ban leh kut-ke ber a ni” ti tein an sawi thin. Kohhran ban leh kut-kete chu tute nge ni ang le?

Kohhran hi pawn lam mi leh ring lotuten an sawichhiat leh nuihzat mai loh nan thahnemngai taka tuam hlawmtute, inkhawm peih tak, hnatlang taima, thawhlawmah pawh mahni neih tawk leh phak ang tawka tlan chhe ngai lo, mite relna leh sawiselna avanga rawngbawlna chawlhsan ngai lo, insiam that ngaihna laia insiam tha leh tlawm zawk nih hreh lote hi kohhran ban leh mi puitling chu an ni.

Pathian thusawi thiam tak leh thlarau lam zai thei tak si phur lai chauhva inhmang, tih hram hramna nei lo leh nihna avang chauhva kohhrana inhmangte hi kohhranah ban an tling zo lo a ni. Kan chak reng vang ni lova kohhrana nihna kan neih hian, “Ka thiam lo, ka tlin lo” tia tling tura tan lak leh theih tum si lo, banna theih lut ngam tak tak chuang si lote hi mi puitling lo zia a ni.

Tin, thawhlawm chungchangah hian mi puitling leh kohhran hmangaihtu chu hriat a awl khawp mai.  Thawlawm khawntute tana kal leh chakawm lo khawpa lo siam ching kan nih chuan mi puitling lo tak kan  ni tihna  a ni, sim vat a tha. Phur tak leh hlim hmel taka lo chhan hi kan tih tur a ni a, kan remchang rih lo a nih pawhin tawngkam tha taka thlah thin hi mi puitling nihna a ni. Thlarau lam Revival a lo thlena nuam ti tak leh, thusawi peih takte pawhin thawhlwm an ngaih pawimawh loh chuan miten hnung lam atangin an nuihzat thin. Chutiang bawkin thawlawm thawh peih leh ngai pawimawh takte pawh inkhawm ngai pawimawh leh miah si lo a awm theih a, chutiang mi kan nih chuan, mi puitling lo kan ni tih inhriata sim a tha hle mai.

A tawp berah chuan, kohhran ban kan nih theuh theih nan kan rawngbawlna kawnga kan tih tur leh committee-in tihtur min tukte chu tihlawhtling zel ila, kohhran programme, inkhawm, committee, hnatlang leh thawhlawm hrang hrang ngai pawimawhin tih hlawhtlin theuh i  tum ang u.