BIAKBUK THIANGHLIM

Lalhmingchhuanga 

Thuthlung hlui lamah khan, “Sabbath Thianghlim” tih te leh “Temple Thianghlim” tih a lar hle a. Chu “Thianghlim’ tih tawngkam chu Paula pawhin a rawn hmang rim hle a, “Lalpa mi thianghlimte” tiin. Paulan mi thianghlim a tih hi sualna nei lo leh fel lam ai mahin, ‘Lalpa tana serh hran’ lam a kawk zawk a ni awm e.

Lalpa Temple Thianghlim tih pawh hian, Biak In chu in dang aiin a felfaiin a sak danah a mawi zawk a, a fai zawk tih lam ni lovin, ‘Lalpa tana serh hran’ a nihna hi Temple Thianghlim a nihna chu a ni. Biakbuk chu Lalpa ta, ama in leh a tana hmun serh thianghlim a ni a, chu chu a dang aia a thianghlimna chu a ni. A bungbelte leh a hung chhungte chu in dang aiin a fai zawk kher lo a ni maithei, mahse Lalpa tana hmun serh thianghlim a nih avangin thil dang tih nan a rem ve lo a, a zahawmin a thianghlim tur a ni.

Hmun thianghlim a nihna angin kan zah thiam tawk lo deuh em aw a tih theih ang, kan enkawl dan chu thu hranah dah rih phawt ila, kan thinlunga kan dah danah hian a Thianghlimna leh a zahawmna hi kan hmuh hmaih a ang deuh thei em. A hung chhunga kan thil tih duh dan (Zuk leh hmuam, fiamthu etc) te leh kan awm danahte hian.

Kan naupangte hi nakin zel an biakbuk rawn hmuh danah hian a zahawmna leh a thianghlimjna an thinlunga kan tuhsak meuh em le? I fa kha Biakbuk chhungah a tap a ni thei, ei tur hmangin thlem ta la, a inawm tlei nan ei tur pe ta la, a thinlungah Biakbuk zahawmna i tuhin i inring em? Biakbukah chuan ei tur ei a tum pawhin phal lo ta la, a zahawmna a thinlungah i tuh zawk thei ang em?

A tawp berah chuan, Lalpa tana hmun thianghlim leh zahawm a nihna hi kan za hian i vawng nung reng ang u hmiang.