Nazaret Isua Krista

 Roluahmawia

Peteran “Tangka leh rangkachak eng mah kan nei lo; nimahsela, kan neih chhun ka pe ang che: Nazaret Isua Krista hmingin kein kal tawh rawh,” a ti a.

Petera leh Johana chu behliang mun hun, ṭawngṭai hun lai chuan ṭawngṭai turin biak inah an chho a. Patling tu emaw, a pian tirh aṭanga ke bai an rawn zawn a, biak in kawngkhar ‘Mawi’ an tih bulah chuan muin ni tin ṭawngṭai turte hnenah chuan kut a lo dawh ve ṭhin a ni.

Heng biak ina lut ṭhinte leh ṭawngṭai ṭhin, Pathian ṭih tak takte pawisa pek khawmin he kutdawhpa hian ei a hmu ve ṭawk ṭawk a ni. Chutih lai chuan Petera leh Johana chu ṭawngṭai turin biak inah chuan an kal a. Nimahsela, eng mah pek tur an nei lo, kutdawhpa hnenah chuan Peteran mi han en rawh a ti a, beisei nei takin a ena, Petera chuan tangkaleh rangkachak eng mah pek tur che ka nei lo, nimahsela kan neih chhun kan pe ang che, Nazaret Isua Krista hmingin kein kal tawh rawh, a ti a. A kheimit ruhte lo chakin damna a chang ta tih kan hmu a ni.

 

Kha kutdawh pa khan, ni tin kut a dawh a, ni tin a nun khawchhuahna khawp thilpek chu a hmu ve mai bawk a. Nimahsela, a tawpah chuan pek ve tur nei lote kut aṭangin damna tak tak chu a hmu lawi si a ni. Vawiin hian keini hian eng thil nge kan bul vela mite hi kan pek ve theih le, mi ṭhenkhat Pathian ringtu mi ṭha tak tak an awm, chung mite chuan mi dangte tanpuinan leh chanhai zawkte chhawm dawl nan, an sum leh pai tam tak tak an senga, heng mite pek khawm leh thawhna avanga ei tur leh sin tur hmu ve ṭawk ṭawk mi tam tak an awm, an thawk thain an van thawk ropui teh lul em. Keini hi han inen ve ila, eng e kan pek ve theih le? Petera leh Johana ang tho kan nih hlawm hi, tangka leh rangkachak eng mah pek tur kan nei lo, nimahsela kan neih chhun chu Nazaret Isua Krista thu hi a ni.

 

Khawvel mite angin kan hausa lo va, sum leh paiah kan tlabal a ni maithei. Tin, ṭanpui ngaite ṭanpuia an ṭamna chhawka inhnangfaktirna tur neih kan nei lo a ni maithei, nimahsela kan neih chhun chu, chatuana damna thu, Nazaret Isua Krista thu min chah hi a ni. He thu  hi ke baiin damna a neihna ang kha a ni, ni tin kut dawhin a dam chhung chaw kaw puarna chu Pathian ringtu mi fel tak takte pek khawmin a awma, a eiin a in a, a nung ve reng tho a nih kha. Nimahsel, a ei a a innate khan damna tak tak a pe lo, damna tak tak petu zawk chu, Nazaret Isua krista a ni. Chuvang chuan khawvelah neih nei lo vin,  mi dangte tan tih theih nei lo vah kan lo inngai maithei e, mahse tih theih leh tih tur tam tak kan nei a ni. He kan chhandamna thuruk hi a hre lote hnenah puanzar mawlh mawlh kan ngai a ni. Tangka leh rangkachak pek tur che kan nei lo, nimahsela kan neih chhun ka pe ang che, Nazaret Isua Krista hmingin i sualte tlen fai nan, Baptisma chang rawh, tihte hi kan hmabak kan tih ngei ngei tur chu a ni, he thu hi damchhung puar leh fanna mai ni lo, chatuan a damna thu a ni.