Serchhip Hebron Kohhran (MUPC) a lo din dan - Tk Vanlalrema

Tirhkoh Vanlalrema

Mizoram UPC a lo din hma hian Serchhip Town-ah hian UPC biak in pali, Biakinpui, Dinthar, Electric veng leh N.Serchhip-ah te a awm a. Mizoram UPC Hebron hi Biakinpui leh Dinthar local atanga chhuaka awm hrang ta kan ni.

Dt 15^th July 1992-a UPC NEI General Superintendent-in N.Mizoram Districat Secretary R.Hrangvunga lehkha a rawn thawn a, N.mizoram District-a Pastior Saihnuna, Rev.Zaikunga leh Rev.Lalbiakkunga te September 1992 hma ngeia pensiona chhuak turin a rawn tih kan hriat atang chiah khan kohhranah rilru inthuhmun lohna a rawn piang nghal a. 


Kum 1992 April-a UPC NEI hman tur, Pension Rule Lunglei Rahsi veng Biak Ina General Conference-in a pass khan, “Hnathawktu chu mihring kuma kum 60 a lo tlin tawh chuan Pension-in a chawl tawh tur a ni (Rorel Bung 3, Sub No 2). Hnathawktu chu mihring kuma kum 60 lo tling tawh mah se, election term a lo hman lai chu a lal zawk anga, a term (inthlan term) a hmang zo ang” tih a ni a. NEI UPC District hruaitute chu kum li term nei an ni a, an election term hmang zo tur chuan kum 1994-ah a chunga Pastor kan sawi takte khi pension-in an kal tur ni awm tak a nih laia, an term hmang zo lo va kum 1992-a pensiona chhuak tura General Superintendent-in order a rawn chhuah tak thut atang hian, General Superintendent order chhuah angin an pension mai tur a ni tih leh, an term an hmang zo tur a ni, tih ngaihdan pahnih neiin rilru lamah kohhran mipuite kan inthen ta phawk kha a ni a.

Hun  a lo kal zel a, NEI UPC Executive Board Dt 31^st October 1992-a Shillonga rorel chuan, General Superintendent order chhuah tawh anga hnathawktu kum 60 lo tling tawhte chu ‘pensiona chhuahtir tur nge an term an hmang zo ang’ tih chu an ngaihtuah leh ta  a, term laklawh te chuan an term an hmang zo ang tih an pass leh ta a. Chuti a nih chuan N.Mizoram District chhunga Pastor kum 60 lo tling tawh te pawh chuan an term hmang zovin, kum 1994-ah pension-in an chhuak tur a ni ta a.

November ni 2, 1993-ah UPCI General Missions Director Rev.Harry E Scism USA chu Aizawlah lo kalin, kum 1993 November ni 7 (Sunday)-ah NEI pension rule a lo siam chu a suspend ta a. ‘Hnathawktu mihring kuma kum 60 lo tling tawh chu pension-in an chhuak tur a ni tih chu kum 65 a ni zawk tur a ni’ a tih tak avang khan, kum 1994 a lo her chhuah a, an term hmang zova pensiona chhuak mai tura ngaih tawh Pastor-te pawh chu kum 65 an la tlin si loh avangin pension-a chhuahtir theih an ni ta lo a.

Kum 1944 a lo her chhuak a, District hruaitute thlan thar a lo hun ta a. N.Mizoram District hruaitu tur chu Dt 5^th March 1994 inthlanna chu Headquarters Biak In, Aizawlah neih a ni a, District Superintendent-ah Rev.Saihnuna, District  Secretary atan Rev.R.Thangliana, District Treasurer atan Rev.H.Vantluanga te thlan thar an ni a, District Secretary lo chelh mek Rev.Hrangvunga leh District Treasurer nihna lo chelh mek Rev.Lalrinsanga te chu an tla ta a.

Chutia District hruaitu thlannaa tling zo ta lo leh an lam tang Pastor eng emaw zat chuan N.mizoram District chu hawlh phela District thar din an rel ta a. Inthlannaa tlaa lungawi lo ten District thar din an dil chu kal tlangin Dt 3^rd April 1994 General Conference Shillonga rorelnaah chuan pahr thluk a lo ni ta a.

N.Mizoram District hruaitu thlana tling zo ta lo leh an lam tang ten District thar an dil chu tihhlawhtlinsak an lo nih takah khan, inthlanaa tlaa lungawi lo ten dik lo taka District thar an dil pek an ni a, an District hruaitu turte pek nihphung leh mizia te, an lam tang Pastor ten dawt sawi an pawisak lohzia te kan hriatin zui tlakah kan ngai lo a ni.

N.Mizoram District hawlh phela Aizawl East Distict dik lo taka a lo pian takah khan Serchhip chu Aizawl East District huam chhunga mi kan lo ni a. Mahni thawhpuite in leh lo invawm luhna tur pawh inbuatsaihna hun awm miah lova, chawpchilh taka pension-a chhuahtir duhte, an tawngkam leng vel pakhatah phei chuan, “Saihnuna chu pensionin kan chhuahtir anga, mi in hnuai a luah ang a, meihawl a rawh ang” an tih thawm te kan hriat chuan, heng ho hi zui tlak an ni lo ang tih min ngaihtuahtir a. Dt 14^th May 1994 (Inrinni zan) chuan Upa K.Leisanga inah Aizawl East District-a awm duh lote chu inhmu khawmin, inkhawm hran kan rel ta a. 

May ni15 1994 Sunday-a inkhawm hrang tur chuan thu kan titlu a. Unau thenkhatte leng kualin kan thl tum chu hriattir an ni a. Serchhip Biakinpui, NEI Church Board Chairman address-in, Aizawl East District zawm duh lova, N.Mizoram District-a awm duh zawk te chuan Dt 14.5.1994 hian Upa K.Leisanga inah inkhawmna kan nei dawn tih lehkha kan pe a. Chumi an hria chu an thin a ur hle a ni awm a.

Kohhran hruaitu inform-na neih a nih hma chuan Chairman ah Upa K.Leisanga, Secretary ah Upa R.Laiawrha, Treasurer ah Bro K.Sangdawla te hman an ni a, Upa Laia hian Sawma pakhat a enkawl tel bawk.

Kan inkhawm hran tirh hian Upa Deacon ni sa chu Upa K.Leisanga leh Upa Rokhuma te an ni a. Dt 6.6.1994 ah N.Mizoram District PYD President Tirhkoh JH.Lalsawmliana chu lo kalin, heng mite hi Upa leh Church Board member atan a ruat:

Upa atana ruatte

    1.      Upa K.Leisanga

    2.      Upa R.Laiawrha

    3.      Upa Rokhuma

    4.      Upa K.Sangdawla

    5.      Upa C.Lalkhuma

    6.      Upa R.Zoramnghinga

Church Board member atana ruatte

    1.      Unaupa Thangchungnunga

    2.      Unaupa C.Vanlalzapa

    3.      Unaupa F.Lalneihkima

    4.      Unaupa Lalnunnema

Kan inkhawm hran tirh hian member engzat chiah nge kan nih tih hi inhriat tuma inchhiarna kan nei hran lo niin a lang a, Dt 16.6.1994 ah Upa bial then a ni a, bial 8-ah inthenin chhungkua 69 kan awm.

Dt 23.5.1994 (Thawhtan zan)-ah kohhrana mawhphurhna hrang hrang neitute ruat an ni a, hetiangin:

PYD

President         :           Unaupa Ronghak  
Vice President :           Unaupa C.Rodenga          
Secretary         :           Unaupa Ronghinglova      
Treasurer         :           Unaunu Hmingthanchami  

Building Committee

Chairman                     :           Unaupa C.Vanlalzapa
Vice Chairman             :           Unaupa Lalnunnema
Secretary Treasurer     :           Unaupa K.Lalhmingmawia

Puitling Sunday School

Superintendent            :           Unaupa C.Lalkhuma
Asst Suptd                   :           Upa K.Leisanga         
Secretary                     :           Unaupa Zoramnghinga     
Asst Secretary             :           Unaupa B.Lalana

Missions Department

Director                        :           Unaupa F.Lalneihkima     
Secretary Treasurer     :           Unaupa Rothanga

Ladies Auxiliary Department

President                     :           Unaunu Saichami Sailo     
Vice President             :           Unaunu C.Malsawmi        
Secretary                     :           Unaunu Independen-I       
Asst Secretary             :           Unaunu Lalramzauvi         
Treasurer                     :           Unaunu Ramsangliani

Chuarch Board Committee vawi 9-na, Upa K.Rokhuma ina neih, Rorel No 2-ah chuan kan biak in hming atan HEBRON tih chu pawm a  ni.

Bul kan tan atang hian Pathian Thlarau awmpuina kan dawng nasa hle a, rei lo teah biak in, a chung Tarpaulin, a bang dap-in kan nei a. Chawimawinate awmin Evan H.Lalhmangaiha Hqrs Aizawl chu Speaker-a hman thin a ni a.

Pathian kan hnenah a awm avangin kan thla a muang a, sal tang chhuiak ang main Pathian Thlarau zalenna hnuaiah hlim leh lawm takin kan kal a, kan suangtuah phak loh Thlarau Thianghlim zalenna kan chang thin chu a mak pawh kan ti hle.

(Thu lakna : Gedalia (MUPC Serchhip Bial Silver Jubilee Souvenir, p34-39)

• 
• 
•