Serchhip Bial PYD Thu leh Hla Kûtpui cum fellowship

June ni 24, 2019 (Thawhtan zan) khan kan nghahhleh Serchhip Bial PYD thu leh hla kutpui chu kan hmang ta. He hun hi Hebron NPSS Hall ah hman niin, T.Upa B.Lalbiakdika'n min kaihruai a ni. Programme tan a nih hma hian Lalpa fakin kan zai ho a, a tir phat atangin zai a nuam a, kan kham lo nghal ti tih ringawt a.

Tk Vanlalrema'n hun serh a hmang a

Zai hona kan neih hnuah hunserh hmangtu tur Tk.Vanlalriema sawm nghal a ni a, anin PYD kal khawmte chu Lalpaah chauh kan inghah a, khawvel mita thlira thil tha leh innghahna tlak ni awm taka langah te pawh innghal lova, Lalpaa inghah zel kan zir a pawimawhzia sawiin, fuihna thu tha tak takin min fuih a ni.

Bial PYD Secretary-in report a pek zawh hnuah kan host (kaihruaitu)-in group zai, Hebron PYD te a sawm a, Unaupa Lalhruaitluanga hla phuah, "Pentecost thalai" tih hla an rawn sa a, hla ziarang danglam tak mai kan ngaithla a, boruak a kang chho tan hle a ni.

Kan zavai a kan tel theihna chi, bial chung chanchin atangin quiz neih leh nghal a ni a, kan quiz master Unaunu Malsawkimi inbuatsaihna a tha bawk a, nuam kan ti tlang hle a ni. Zoar PYD lam air awha zaia min awi tur, Unaupa Lalremruata, kan host-in an sawm leh a, beng a tlai thin teh e. Chumi zawhah chuan, Hebron hla phuah thiam chhuanvawr, Unaupa John Lawmsangkima hla phuah chu Unaunu PC Lalkungpuii'n thiam tak mai in a rawn sa leh vang vang a, beisei ang ngeiin a nalh lah a nalh narawh e, a hla kha nalh satliah a ni lo, a satu khan a thiam a ni; thu leh hla kût hlawhtlinna pakhat a ni phawt mai. Tin, Keitum Ramthar PYD atangin T.Upa Lalpianpuia'n ama hla phuah mawi tak mai chu thiam takin a rawn sa bawk a, beng a tlaiin a ngaihnawm thin teh e. An zai thiamin an hla a nalh si, kha laia hmun atang khan awmhmun sawn lovin hmun dangah min hruai leh veng veng thin.

Kûtpui hlawkthlak tak a nih theih nan tiin kan hruaituten in ruahmanna tha tak mai, "Pathian pakhat thu" programme an lo duang a, Unaupa Lalhmingliana khaihruaina hnuaiah Pathian pakhat thua zawhna awm sate chhanna hun hman a ni. Panel-ah T. Upa Lalpainpuia leh Unaupa Lalhruaitluanga te an thu a, panel-a thu tura beisei zinga mi pakhat a rawn tel thei ta lo hlauh a ni. Hun te a kal chak duh em avangin hun rei erawh hman a ni ta lova, kham lo takin kan tawp ta rih a.

Thalai kal khawm chuan hlimpui tur kan lo mamawh thin tih hriain, Hebron PYD special item ah kan kût min hmanpuitu khual duhawm tak tak an ko chhuak a, “Kasauti zindagi ki” lam atang Unaunu Oparna-i te, India hnampa pu Gandhi-a te, Arnold, Micheal Phelps, Salman bhai leh mi hrang hrangte khan min lo hmanpui chu niin kan hlim hle mai. Tin, Unaupa Lalfakawma'n thuchham lungkuai tak maiin kan item hnung a khar a, lawmman semna te nei lehin zai leh tawngtaina nen kan hun kan titawp ta a ni.

Hlimthla thenkhatte

• 
• 
• 
• 
• 
•