NGAIHDAMNA

Pc.Vanlaldiki

“Kal la, ti sual leh tawh suh”

Ngaihdamna hi chu dawn nuam tak leh mi tinin kan beisei fo ni mah se, mite hnena thlentir chu thil awl-ai lo tak niin a lang. Tu te emaw chungah kan tum reng vang pawh ni lovin thil kan lo ti sual palh a, hrehawm kan tih em em laiin min ngaihdam thu kan han hriat meuh chuan kan hlim hle thin a ni. Tin, tih palh ni lo, kan duh a kan tih sual luih ngei leh thil tha lo kan thlen tirna ngeiah pawh hremna aia ngaihdamna kan chan chuan a la lawmawm tho mai. Chutiang taka thil pawimawh a nih chuan, mi tinin kan mamawh ti ila kan sawi sual awm lo ve. Amaherawhchu, kan mamawh rual rualin pe chhuaktu nih erawh chu kan harsat hle thung si.

Chanchin tha Johana ziak bung 8 kan chhiar chuan,

Uire lai an man hmeichhe pakhat chu Lal Isuan a ngaihdam thu kan hmu a, pharisai ten an dan anga lunga denhlum mai tura an ngaih chu a ngaidam theitu Isuan a ngaidam a ni. Urenu tan chuan a lawmawm hle ngei ang. Amaherawhchu Isuan a ngaihdamnaah khan a duh tawk mai lo va, ti sual leh tawh miah lo turin a hrilh nghal a, uirenu tan pawh ngaihdamna a chan rualin ti sual leh tawh lo tura a fimkhur nghal a ngai bawk a ni.

Keini pawh kan sualnate ngaihdam nan Isua hmingin Baptisma kan chang a, Thlarau zakhamnate kan chang tawh a nih chuan, ti sual leh tawh lo tura kan nun kan uluk a tul hle a ni. Sualte ngaidam theitu kan neih vanga kan tihsual nawn fo va, ngaihdam ngai kan nih reng mai chuan, kan beisei angin ngaihdamna kan chang fo lovang tih a hlauhawm.

Kan sualnate ngaihdam kan nih rual hian, ti sual tawh lo tura thu pek kan ni tih kan inhriat reng a tul a, hre reng chunga kan tih sual luih si chuan, sualte tana inthawina a awm tawh lo vang a, dotute kang ral tur thinurna meipui chu kan hmachhawn a ngai tawh dawn a ni tih inhriat a, ‘NGAIHDAMNA’ kan chan hi a petu LALPA duh dana nunpui i tum ang u.

(John 8:3-11, Heb 10:26-27)