BAPTISMA CHAN PAWIMAWHNATE

B.Lalbiakdika

Greek thumal ‘Baptizo’ tih chu sap hovin letling hran chuang lovin ‘Baptism’ an ti a, Mizo tawng Bible letlingtute khan ‘Baptisma’ tiin an dah ve leh mai bawk a, a awmzia takah chuan ‘Hnim phum/Chiah pil’ tihna a ni. A pawimawhna leh a hlutna tlem han zir ho dawn teh ang.

ENGTIA CHAN TUR NGE:

Kan sual zawng zawngte simin, sual ngaihdamna turin kan Lalpa Isua Krista hmingin tuia hnimphumin kan chang tur a ni. Kan Lalpa Isua hian nihna (Title) kawng thum
a nei a, Pa, fapa, leh Thlarau thianghlim te hi a ni. He a nihna hrang hrang te hi lam duat duat a in-baptis thin an awm a. Mahse, Bible chuan he nihna hrang hrang neitu Amah Lalpa Isua hming ngei hian Baptisma hi inchantir thin turin min ti a ni. (Tirh 2:38)

 

KRISTA SERH TANNA A NI.  

Abrahama hnenah pathianin thu a thlunga, Abrahama leh a chhungte mai bakah a ina cheng bawih leh bawih lo pawh, an serh hmawr vun an tan sak vek tur a nia, an tan lo anih chuan tih boraltur a ni (Genesis 17). Pathian chhungte zinga kan telna chu serh tan hi a ni a, tun hunah hian Kristaa kan serh tanna ve thung chu Baptisma kan chan hi a ni (Kolosa 2:20-21). Chuvangin Pathian chhungte zingah kan tel ve theih nan Baptisma chan hi kan tih makmawh a ni.

NOVA LAWNG ANGA CHHANDAMNA A NI.

Khawvelah tui a lo let dawn khan Pathianin Nova chu lawng tuk turin a ti a(Gen 6:14), tui a lo leta khawvela mihring zawng zawng an boral ni chuan, Nova te chhungkua chuan Pathian thu an awih avangin tuilet hmanga khawvel mihringte Pathian hremna lak atang chuan chhanhimin an awm ta. Tun hunah ngei pawh Pathian chhandamna kan chan theihna tur Nova lawng anpui chu Isua hminga baptisma kan chan hi a ni(1 Petera 3:20,21)

KRISTAA KAN INTHUAMNA A NI.

“In zingah Kristaa baptisma chang apiangte chu Kristaah chuan in inthuam tawh si a” (Galatia 3:27) tih thu ang khan. Isua Krista hminga Baptisma chang apiangte chu Isua in kan inthuam a ni. Miin a taksa nalh lo lai te thup mawi nan thawmhnaw a inbel thin ang hian;  kan khawlohna te, kan sualna te chu kan inthuamna Lalpa Isua chuan min hliah khuh sak a, ngaihdamin kan lo awm thei ta a ni.

KRISTA A PHUMA AWMNA A NI.

Kan mihring hlui chin rala, Isua Krista phumna kan tawm ve na chu Baptisma kan channa chauh hi a ni(Rom 6:4)

CHHANDAMNA A NI.

Kan chhandamna tur atana Lalpa Isua thu min pek a ni. Hei lo chu kawng dang a awm lova, hemi tel lo chuan chhandamna hi engti kawng mahin a chan theih loh (Marka 16:16; Johana 3:5)

THLARAU THIANGHLIM PEK TIAM HMUH THEIHNA A NI.

“Sim ula in sual ngaihdam nan Lalpa Isua Krista hmingin Baptisma chang theuh rawh u, tichuan thlarau thianghlim pek tiam hi in hmu ang” (Tirhkohte 2:38); a chiang tawk em em a ni.